Sa lahat ng bagay, Alpabeto ; Ako ay si, Talangka

=== SA LAHAT NG BAGAY ===

Sa lahat ng bagay, iyong pag-igihan

Hindi lang sa iisa, hindi lang sa iilan

Marami kang kayang gawin kaibigan

Ang sarili'y 'wag mong limitahan

Pag-igihan mo sa bahay, sa trabaho't lipunan

Ang iyong pagkatao'y may likas na kakayahan

'Wag kang susukong tumuklas

Na tila isang batang musmos na sabik lumakas

Batang wala pang muwang

Batang walang kapaguran

Batang gagawin ang lahat

Maabot lang ang nais sa kawalan

Sa lahat ng bagay, pag-igihan mo lang

Hindi ka nag-iisa. Hindi ka lubusang nag-iisa

May gagabay sa'yo, maghanap ka lang

Kaibigan o pamilya, maabot mo 'yan

=== ALPABETO ===

Isa, dalawa, tatlo,

A Ba Ka Da; ito ba'y natatandaan mo?

O aking kaibigan, samahan mo ako

Halina't magbasa tayo at unawain ito

Angat man ang tingin natin sa'ting mga sarili

Bagkus ang katotohana'y hindi laging ganoon

Kapag sa pag-unawa'y hindi natin pinag-igihan

Dali dali rin tayong bubulusok doon sa lansangan

Espadang halintulad ng ating salita

Gamay lang naman ang natanggap ng karamihan sa madla

Hanggang saan lang ba ang ating kakayahan?

Ito ba'y tatanggapin lang natin ng malugod sa kalamnan?

Lagi tayong nagiging laman ng balita

Matagumpay sa lahat ng anggulo, mabuti man o masama

Narito ako ngayon upang tumugon sa inyo

Ngayong araw, ay unawain naman natin lahat ng salitang laman ko

Oras na para bumangon, tasahan muli ang ating mga isip

Pasasaan ba't tayo rin naman ang makikinabang

Raragasa ang pagpapala, sumalungat lang sa ihip

Sa ihip na nagsabing ang ating pag-unawa'y walang 'sing liit

Tayo na't huwag ng ipagpabukas

Unawain ng mabuti ang mensaheng dinaanan ng mga mata

Wari'y dito nakasalalay ang buhay na tinatamasa

Yaman na mula noo'y nasa atin lang pala

~ • ~

=== AKO AY SI ===

Kailan?

Kailan nga ba natin dapat simulan?

Mga bagay na hindi dapat tinangkilik

Mga pag-uugaling dapat wakasan

Bakit nga ba lagi kang kuntento?

Sapat na b'ang isang kahig isang tuka?

Mga pangarap mong nanatili lang sa ulo

Ni pagsilab ng apoy ay hindi mo tinangka

Juan, Juan, Juan

Hanggang riyan ka nalang ba?

Tamad na ginawa mo ng apelyido

Talagang isinabuhay at isinapubliko mo pa

Bawat isang sinasalamin ng ngalang ito

Parang awa niyo na, mahiya naman kayo

Ilang dekada na ang lumipas

Iba naman ang ipamana natin sa susunod na siglo

=== TALANGKA ===

Utak talangka na ang direksyo'y pababa

Kumusta ka na ba? Ang tugatog ng buhay b'ay narating mo na?

Sa ilalim ng iyong mga paa'y sinu-sino na ba sila?

Mga kaibigan? Kapatid? Ilan na bang pamilya?

Kung sa pang-unawang pangtao'y meron sila

Marahil sa iyong pintua'y naroon at kumakatok na

Hitik sa bunga ng poot at galit

Sa sahol ng pagkukumpara ng ngalan nila

Oportunista't manggagantso

Ano pa bang gusto mong itawag sa'yo?

Bagong taon, bagong lolokohin lagi ang pakana mo

Sa may pakinabang ka lang naman magaling hindi sa mga sariling paa mo

Bayanihang kinaligtaan, paubos lang ang mga kubo

Umangat ka kung iyong nais pero 'wag kang humatak pababa ng tao

May panahon ka pa, ikaw na syang tinatamaan

Tandaan mong sa isang iglap, paghinga'y maari ka ring mawalan

~ • ~

Ang mga akdang ito ay lahok sa sa Saranggola Blog Awards 11